222【訪英台】
杭州讀詩三年滿 學堂學生去考官 留我三伯足無伴 來找英台袂孤單
卜返武州阮厝內 就叫士久去安排 書冊全部收箱內 者去稟報先生知
先生內面帝喝茶 聽著三伯卜回家 千言萬語心內話 卜講英台兮問題
就請師娘出房內 從情講給三伯知 英台卜返有交待 叫你提親趕快來
三伯聽著心歡喜 原來英台是女兒 越頭就叫士久伊 行李快款莫延遲
師母看伊笑咪咪 講給三伯你知枝 前日英台卜返去 交待銀釵訂親誼
三伯雙腳跪落地 感謝恩師兮栽培 那甲英台來作伙 天大功勞先生兮
先生聽著笑呵呵 行倚講給三伯知 英台對你是真愛 快去提親合應該
士久出聲叫官人 行李捆綁照起工 天色無早快震動 這擺路途無輕鬆
想著卜返心歡喜 十分輕鬆笑微微 小妹甲我約日子 二八三七四六期
官人算帳足咸慢 伊約日子者十工 官人算術無允凍 時到敢會找無人
著喊士久免加話 趕路來去會裙釵 見面者加問詳細 瞞我三年什問題
雙腳行到五里亭 想起當初三年前 英台甲我有約定 結拜同行過一生
英台甲我約日子 祝府相親好佳期 回想過去兮代誌 三伯真是怣大豬
主僕行到水池邊 看見水底飼金魚 卜會英台足歡喜 延路遊賞吟歌詩
士久卜稟官人知 人我心中有意愛 卜娶銀心返厝內 官人替我做主裁
三伯聽說笑咪咪 你愛銀心無希奇 三年同床情無比 會得結成連理枝
你娶銀心做牽手 我甲英台罵有巢 結婚衫褲愛講究 真珠瑪瑙難得求
士久卜勸阮官人 心肝想著足不甘 你甲英台有允當 伊袂嫌咱散赤人
遠遠看著祝家庄 真快就到祝家門 三伯心肝匹砰返 卜見英台心頭酸
行到祝府門腳口 英台門嘴帝等候 看到三伯伊來到 牽哥兮手入內兜
兄妹相見足歡喜 就叫銀心去準備 閣叫安童好排比 快煮炊炒款待伊
小妹情份這爾重 三伯心肝真輕鬆 成雙成對有所望 叫你僥我先不通
英台卜問三伯伊 話袂出嘴喉先鄭 杭州甲哥約日子 為何誤了十日期
223【英台廿四送歌】
一送梁哥卜起身 千言萬語說袂盡 保重身體上要緊 不通為妹費心神
三伯被送面帶紅 听妹言語刈吊人 我今卜返免妳送 勞動小妺妳個工
二送梁哥淚哀哀 吩咐當時你無來 夭壽馬俊來所害 者著甲哥分東西
三伯聽著就應伊 小妹無情共薄義 杭州甲我約日子 在通講我來卡遲
三送梁哥出大廳 千言萬語叮嚀兄 自己心肝著岸定 不通為妹費心晟
三伯聽著人真瘀 六月刈菜假有心 小妹甲我用嘴錦 菜籃挑水乎哥喝
四送梁哥卜出門 勸哥心肝不通酸 哥你就愛聽我勸 不通為妹刈心腸
小妹言語免箱多 馬俊娶妳結夫妻 僥雄小妹上敢做 無想早前當元初
五送梁哥出門外 兄妹分開無快活 不通冥日想著我 趕快京城去考官
三伯聽著應一聲 小妹在通擔誤兄 杭州甲我約束定 今日乎我來空行
六送梁哥出門前 十步卜走九步停 夭壽馬俊來定聘 甲哥分開真不明
三伯聽著流目屎 第一僥雄祝英台 無想杭州同結拜 在通無影約我來
七送梁哥到大埕 英台行倚勸梁兄 馬俊做前來送定 者著乎哥來空行
三伯聽著應出來 小妹嘴水我也知 無想杭州來結拜 誤我空行太不該
八送梁哥到牆圍 無疑雙人會分開 甲哥一人帶一位 不知何日閣做堆
英台小妹用嘴水 到這我看難改圍 妳貪馬俊卡富貴 無想甲我來做堆
九送梁哥墻圍口 雙手掛在哥肩頭 望卜甲哥好甲老 無疑有頭無尾稍
三伯聽著心招糟 妳我分開無奈何 小妹嘴錦實在好 見講的話刈吊哥
十送梁哥到小路 夭壽馬俊太糊塗 梁哥為我冥日苦 望卜讀書有前途
三伯聽著心茫茫 小妹做事真不通 既往不究妳免講 陰司地府再相逢
十一送哥到柴橋 心肝可比火塊燒 你我分開太可惜 親像樹尾風塊搖
三伯聽著面憂憂 小妹嘴水免兜留 妳願馬俊做牽手 無彩我塊共妳求
十二送哥大路邊 英台目屎掛目墘 可憐梁哥卜返去 閣卜相見等幾時
三伯聽著憂憂苦 妳我分開無奈何 三股頭毛剪一股 奉送小妹做鬃步
十三送哥路中央 聽哥言語刈心腸 梁哥我勸你快返 不通為妹心頭酸
三伯聽著者苦憐 想著目屎汁汁珍 乎妹擔誤無要緊 總是誤害我一身
十四送哥到路西 哥你返去著閣來 早死馬俊來所害 者下甲哥分東西
三伯瘀在心肝內 小妹的話賢鋪排 杭州甲我約束在 今日怎通誤我來
十五送哥水池邊 想卜分開放袂離 梁哥今日那返去 卜閣見哥雞公啼
三伯聽著頭交交 想著心酸目屎流 小妹妳免用海口 好命卜去馬俊兜
十六送哥到渡船 聽著言語心頭悶 死我也無配馬俊 甘願甲哥做一群
三伯聽著心酸悲 安我的心我知枝 那卜心肝有盡意 乎我空返是卜年
十七送哥卜過溪 同哥你講有斬齊 因為母親的關係 不敢逆母的問題
三伯想著目箍紅 今日放我先不通 恁嫁馬俊有所望 看我卜去靠誰人
十八送哥到岸壁 明明心肝為你邪 那返到厝批快寫 小妹定歸你的額
三伯想在心肝內 小妹嘴水賢鋪排 騙我返去阮厝內 通嫁馬家卡靴擺
十九送哥到只位 二蕊目睭扒袂開 不是甲哥用嘴水 所講的話有定歸
三伯想甲人怣怣 小妹做事太不通 用一個嘴湳滲講 見講的話奧提防
二十送哥分袂離 英台甲哥你相辭 梁哥你那是返去 有影寫批來通知
三伯聽伊講這句 心肝愈想愈鬱卒 有影小妹嘴水有 見講的話足工夫
廿一送哥難放斷 雙人對看心頭酸 梁哥你著聽我勸 趕緊回返武州庄
三伯閣再講英台 小妹私心我籠知 我今回返阮所在 敢無生命通閣來
廿二送哥五里埔 不通講我塊亂呼 小妹定歸你的某 甲哥講話無糊塗
三伯聽者目銀銀 干乾用嘴甲我親 妳講的話我不信 所講全無一句憑
廿三送哥五里亭 講著分開心足瘀 斬頭馬俊上僥倖 今日拆散真不明
三伯聽著淚哀哀 輕聲說乎小妹知 我返這病敢會害 敢有法閣見英台
廿四送哥到亭外 牽哥的手來相扌滿 今日分開卜按怎 你來先死我袂活
三伯想著大悽慘 想卜分開足不甘 無彩一日想甲暗 望卜有竹甲有杉
224【三伯病相思 英台哭墓】
梁哥卜返著切切 送君千里終須別 這世無緣後世結 情長話短到這訣
三伯心肝威威鑽 著快離開祝家庄 一人一位真打損 親像夯刀刺心腸
我今不通帶這撘 害哥先行袂開腳 乎哥卜返趁恰早 三顛四倒腳袂踏
親事全連不講起 只有講我來恰遲 妳感者年無勇氣 杭州那敢約親誼
馬俊短命賢用計 坪腳站久即人的 你免緊張駛性第 絕對不入因馬家
三伯聽著娘的話 心肝想起當原初 小妹代誌真敢做 腳踏雙船救不回
英台勸哥返武州 盡情同哥說因由 人我有想通補救 得確不甘甲哥休
三伯想著卜按怎 恰慘夯刀刺心肝 分開袂凍通閣看 相見除非亡魂山
英台勸哥緊返去 根屬想思無了時 你著保重有勇氣 兄妹後會是有期
孤不二章著放斷 堅心回返阮家門 士久近前倚來問 官人腳骨敢不酸
官人你騎在馬頂 久仔馬後拼頭前 是非煩惱無路用 心肝應該放卡清
三伯騎馬越頭看 英台雙手抱心肝 目屎滴落到肚捾 想著分別火燒山
士久行李擔做前 一手牽馬真無榮 大罵馬俊者僥倖 害阮官人死代先
銀心踏倚勸士久 緊娶官人返武州 阮娘心肝那親像 用針禮威無主張
久仔聽著咬牙齒 銀心全連不知枝 官人今日給害死 掃墓愛靠英台伊
久仔你著免受氣 約束日子來恰遲 二八三七四六是 拖慢靴久誤佳期
擔卜閣講是箱慢 聽著天邊雷公陳 官人馬頂佇禮等 就此告別免寒訕
銀心送君心頭酸 久仔著快回家門 天色無早阮愛返 伴娘回返祝家庄
三伯可憐身染病 這病敢也落陰司 為娘吐血淒殘死 為愛者著病相思
世間萬物情為貴 為情為愛來吃虧 三伯為妹流珠淚 這擺無法通改圍
看哥悲傷心足疼 可比烈鼎下狗蟻 返去武州批緊寫 小妹心肝在哥靴
三伯吐血病真重 仙藥來救無彩工 寫批卜甲英台講 這擺破病真壞空
提筆寫批給英台 恁兄兮病天地知 這擺致病敢會害 無命通閣見英台
藥方開給小妹知 久仔送到恁厝內 世問難取兮藥材 勞煩小妹不應該
第一六月瓦頂霜 再加貓眩水雞毛 三項藥材那提返 三伯生命者下長
久仔三步做二步 提批趕路無糊塗 要去祝家其辛苦 日出行到日暗黑
英台坐落房間內 暝日思念哥敢知 為驚母親流目屎 者著甲哥分東西
士久來到英台兜 拼入廳內帝等候 看著英台到門口 想著心酸目屎流
英台行倚問士久 因何傷心目頭憂 什麼代誌會補救 做你講出免兜留
從情講給阿娘知 官人這擺敢會害 每工吐血流目屎 三味藥方寫批內
英台拆批一個看 親像針帝威心肝 梁哥這擺為著我 病甲者重袂收山
批內有寫三項藥 一項我也提袂就 梁哥生命者寶惜 英台心肝抱著燒
英台提筆要回批 交待士久你一個 藥方籠總放批底 頭毛一股是娘的
士久接批趕快跑 三轉兩越到阮兜 雙手揜著腳倉後 大罵英台無尾稍
將批送給三伯伊 內面一片大道理 看批目屎汁汁滴 害我這病允無醫
三伯相思病真重 英台小妹害死人 這擺破病准無望 情愛兩字先不通
三伯病重允凍死 就叫士久留血書 寄給英台小妹伊 陰司地府相會時
墓頭坐柬面向西 小妹出嫁對者來 血書內面有交待 愛來哭墓者應該
眠床倒落七日滿 目屎流淡歸被單 這病來死要按怎 放下母親老孤單
三伯大限已經到 雙腳跪落土腳兜 母親年邁者爾老 不肖無送上山頭
老身內面有聽見 大罵英台卡不是 阮子被伊來害死 放下寡母是要年
三伯倒落在廳邊 交待士久兔顧暝 這擺死落天堂去 墓向祝家大路墘
祝家廳堂鬧猜猜 馬俊迎親連鞭來 新郎生做有夠醜 瘋想要娶祝英台
英台上轎無外遠 已經離開祝家庄 梁哥血書我有勸 絕無入因馬家門
新娘扛到大路墘 狂風大作變暗暝 飛砂走石無地避 三伯顯靈來娶伊
英台哭墓淚哀哀 著叫梁哥你快來 頭叩墓牌句句愛 有靈有聖墓門開
天昏地暗雷一聲 三伯英台相娶行 三伯實在有靈聖 墓門打開眾人驚
金童玉女回天庭 一對蝴蝶如天生 七世夫妻愛認命 袂駛逆天誤前程
227【台北縣慈善會慶祝十週年回顧歌】94年3月15日
慈善成立十週年，不管環境怎變遷，急難救助無改變，服務人群豈敢延。
創會會長楊發明，諸位大德用心耕，大家協力相呼應，俗曰有志事竟成。
蓽路藍縷將會創，若有堅心必成功，初期無錢向誰講，接案時常欠東風。
二屆會長許信雄，永和主席人盡忠，由無到有財提供，地方仕紳羅其中。
總幹事是張金正，運籌帷幄善財經，匡正會務入佳境，吸收會員資源生。
年終關懷老大人，獨居行動勿會 輕鬆，歲末聯歡溫暖送，紅包賀年酒菜香。
理監事會輪做東，建全制度四時同，提好意見春風送，會務確實無凸風。
急難救助無地界，九二一時站出來，東勢三工供飯菜，慈善之名豈瞎掰。
汐止水災黎民哀，三頓斷炊水電壞，趕辦麵包真佳哉，不驚路禾黑 災區來。
三屆接棒林楚卿，建全財務硬腳弓，理監人選採硬性，每年捐款勿會駛停。
任內成立基金會，認捐伍佰第一批，基金千萬已有底，要買會館無問題。
出錢出力大善人，路樹栽種最認真，急難救助上要緊，親像菩薩兮化身。
秘書薪水捐十年，提供會所也免錢，林家善舉佈鄉里，薪火相傳甘蔗甜。
德福芳煙與一平，歷屆市長敢犧牲，奉獻社會好報應，更上層樓三元生。
共襄善舉林長勳，月汝錦郎勤耕耘，永清正儀做事穩，感恩咱的顧問群。
熱心議員有二對，有情有義行相隨，輝廷文劉讚經費，鴻源世喜配合追。
永和代表攏會友，欠用經費不免求，每個都是菩薩手，日日行善樂悠悠。
貢獻大德真正多，每個都是有功勞，人講好心有好報，出好後代災難無。
慈善名聲全縣香，社會局長賢做人，績優社團獎牌送，上台領獎連六冬。
救護車輛捐三台，永和中和坪林知，造福社會山通海，萬項攏是總幹排。
現任會長黃宗和，服務社會智慧高，領導登山又可靠，證明能者必多勞。
開闢坪林風景區，捐種楓樹數千株，鄉長金生賢地主，地方發展勿躊躇。
觀音聖像立坪林，費用楚卿自己擔，菩薩楓林成一擔，茶鄉親像穿新衫。
回首十冬慈善會，當年辛苦暫開花，地方政要都奉陪，永久會員加倍多。
展望未來兮路程，經濟衰退散赤增，眾志成城突逆景，群策群力見光明。
東西南北一大堆，當做笑談吹雞歸，作歌來唱免收費，為善最樂心花開。
沒有留言:
張貼留言